September 03. beaivi 2020

Home

Sáme låhkåmguovdásj dagáj 2019 plakáhtav manna dåbdo lidjin tiebmán. Maŋŋela li duodden dahkam bagádusáv, filmav ja kårtåjt gåvåj ja bágoj plakáhtas nuortta-, julev- ja oarjjelsámegiellaj.

Bagádus la dåbdoj birra, sáme giela ja kultuvra vuodon. Ulmmejuohkusa li mánájgárde ja skåvlå sáme mánáj ja nuoraj. Bagádusán li aj oajvvadusá dåjmajda ja gåktu dåbdoj máhttá barggat sáme perspektijvas. Bagádusá sisadno l hiebaduvvam mánájgárdij rámmaplána ja Máhttolåpptim 2020 sáme milta.

Låhkåmguovdásj la aktan oahpponævvoportálajn www.aktan.no ja SÁNAG/SANKS psykolåvgåj Anne Lene Turi Dimpas ja Margrethe Bals Utsi dahkam filmav dåbdoj birra. Såj filman giehttoba gåktu mánáj ja nuoraj máhttá dåbdoj birra ságastit. Filmma l nuorttasámegiellaj, valla galggá aj hiebaduvvat julevsámegiellaj ja oarjjelsámegiellaj. UNESCO l prosjevtav rudálattjat doarjjum.

Kårtåjt gåvåj ja bágoj máhttá spellamij adnet, duola dagu spelajda «Nieljega», «Snap», «Kortskalle», «Ietjá bágoj», háddidallamspellaj jali ietjá spelajda. Ietjá adnemoajvvadusá gávnnuji bagádusán.

Dáj oahppamresursaj sihtá Sáme låhkåmguovdásj viehkedasstet ja doarjjot mánájgárdijt ja skåvlåjt bargatjit dåbdoj tiebmán.

Oahppamresursa dåbdoj birra.