Mánát deaivvadit čálagielain unnivuođa rájes go besset geahčadit girjjiid ja go oidnet čállosiid árgabeaivvvis. Mánná dárbbaša rávisolbmuid láidesteami čálagiela dovddedeapmái ja hálddašeapmái. Go mánná beassá vásihit ahte muhtun lohká sutnje čállosiid ja girjjiid de oahppá son čállosiid ja girjjiid doaimma. Nu vásihišgohtet mánát mii čálagiella lea. Dát láidesta máná árralohkamii. Árralohkan lea áinnas go mánná “lohká” girjji ađđásahttalemiin vaikko ii máhte vel lohkat. Árralohkan lea maiddái piktográmmaid lohkan, ovdamearka dihte uksagalbbaid govaid, ja eará galbbaid ja logoid lohkan. Árralohkan láidesta maiddái bustávaid ja loguid vuosttaš dovdagoahtimii ja čálligoahtimii (Hoel ja earát 2008: 13-14.)
Árralohkan ii dárbbaš čatnasit dihto gillii, muhto sámegiela ovddideami ektui dáidá buorre jus váldá vuhtii maiddái sámegiela máná čálagiela deaivvadeamis. Galbbain ja čállosiin mat leat oidnosis lea dávjá eará giella go sámegiella. Biepmuid olggožiin lea hárve sámegiella. Rávis olmmoš sáhttá danne leat diđolaš dasa ahte vállje maiddái sámegiela čalmmustahttit mánnái čálagiela deaivvadeamis.