Gealbomihttomearit main lea čállin
Vuođđoskuvlla gealbomihttomearit mat gusket čállimii, galget sihkkarastit ahte buot oahppit ožžot dárbbašlaš máhtu vai ohppet ja vai hálddašit čállima. Gealbomihttomearit addet čielga vuordámušaid dasa maid oahppit galget oahppan juohke skuvlaceahki maŋŋá. Dat galget váikkuhit dasa ahte ohppiid kritihkalaš jurddašeami, hutkáivuođa ja ovddasvástádusdáiddu ovdánit. Dat leat maiddái reaidun heivehit oahpahusa ohppiid dárbbuid mielde ja fuolahit ahte buohkain lea vejolašvuohta ovdánit.
Servodatfága
Máhttit čállit servodatfágas mearkkaša plánet, hábmet ja gieđahallat teavsttaid mat leat heivehuvvon čállinulbmilii. Dat mearkkaša maiddái juogadit, gaskkustit ja ovdanbuktit máhtu ja dieđuid čálalaččat ja geavahit servodatfágalaš doahpagiid, hukset ákkastallama ja suokkardit ja problematiseret servodatfágalaš fáttáid. Dasto mearkkaša dat máhttit duođaštit ja ovdanbuktit servodatfágalaš guorahallamiid bohtosiid čálalaččat. Čállingálggaid ovdánahttin fágas vuolgá álkes faktacealkagiid ja gažaldagaid sátnádeamis ja gálduide čujuheamis, dasa ahte čállit fágateavsttaid, ságaškuššat čuolmmaid ja čujuhit eanet kompleaksa gálduide.
Luonddufága
Máhttit čállit luonddufágas lea sátnádit gažaldagaid ja hypotesaid ja čállit luonddufágalaš čilgehusaid maid vuođđun leat duođaštusat ja gáldut. Dát mearkkaša maiddái válddahit áicamiid ja vásáhusaid ja sátnádit ja ákkastallat oaiviliid. Čállingálggaid ovdánahttin luonddufágas vuolgá tevnnegiid ja teavsttaid geavaheamis dasa ahte geavahišgoahtit dárkileappot ahte dárkileappot luonddufágalaš giela, maiddái govvosiid ja symbolaid. Dát mearkkaša maiddái čállit eanet ahte eanet kompleaksa teavsttaid ja geavahit iešguđetlágan teakstašlájaid maid vuođđun lea kritihkalaš ja máŋggabealat gáldogeavaheapmi mii lea heivehuvvon ulbmilii ja vuostáiváldái.
KOEE
Máhttit čállit KOEE:s mearkkaša máhttit geavahit čála- ja govvagiela gulahallat ja ovdánahttit máhtu oskkuid, eallinoainnuid ja etihka birra. Gálga fátmmasta maiddái máhttit suokkardit iešguđetlágan oaiviliid ja ákkastallat iešguđetlágan oaiviliid vuoste- ja miehteákkaid. Dat fátmmasta maiddái máhttit geavahit fágaspesifihkka doahpagiid čálalaš bargguin ja máhttit árvvoštallat iežas oahppama go barget fágalaš teavsttaiguin. Čállinmáhtu ovdánahttin fágas vuolgá máhttimis muitalit ja válddahit dasa ahte máhttit suokkardit fágalaš čuolmmaid. Dát mearkkaša ahte oahppit čálalaš bargguin eanet ahte eanet geavahišgohtet fágaspesifihkka doahpagiid ja iešguđetlágan gálduid ovdánahttit gelbbolašvuođa árvvoštallat iežas oahppama go barget fágalaš teavsttaiguin.
Historjá
Máhttit čállit historjáfágas lea máhttit plánet ja hábmet teavsttaid main lea fágagiella mii lea heivehuvvon ulbmilii ja vuostáiváldái. Dat mearkkaša máhttit ovdanbuktit fágalaš fáttá dárkilit ja iešheanalaččat ja máhttit geavahit fágalaš máhtu ja doahpagiid iešheanalaš reflekšuvnnain vássánáiggi birra. Čállit lea maiddái vuohki ovdánahttit ja struktureret jurdagiid ja lea oahppanmetoda fágas. Máhttit čállit mearkkaša dasto geavahit iešguđetlágan gálduid doallevaš láhkai.
Duodji
Máhttit čállit duojis lea visuálalaččat gulahallat sámi mearkkaid ja symbolaid geavaheami bokte. Dat mearkkaša maiddái geavahit tevnnegiid ja teavsttaid ovdanbuktinvuohkin hábmejeaddji proseassa buot dásiin, ideaid, tevnnegiid ja bargotevnnegiid rájes gitta duođašteapmái. Dasto dat fátmmasta máhttit kombineret teavsttaid ja govaid go barget hábmemiin ja eará visuála ovdanbuktimiin go áigot ovdanbuktit dovdduid, jurdagiid ja oaiviliid. Čállinmáhtu ovdánahttin fágas vuolgá máhttimis bidjat oktii teavsttaid, mearkkaid ja symbolaid dasa ahte máhttit buoridit logahahttivuođa, heivehit teavstta ulbmilii ja kreatiivvalaččat buohtastahttit visuála váikkuhangaskaomiid.
Biebmu ja dearvvašvuohta
Máhttit čállit biepmus ja dearvvašvuođas lea hábmet teavsttaid maid geavaha biebmoráhkadeamis ja borramiid oktavuođas. Máhttit čállit fágas lea maiddái gaskkustit fágalaš gelbbolašvuođa ja máhttit albmanahttit oaiviliid ja válljejumiid. Čállingálggaid ovdánahttin biepmus ja dearvvašvuođas vuolgá máhttimis čállit álkes gávppašanlisttuid ja oanehis, ovttastuvvon teavsttaid dasa ahte máhttit plánet ja hábmet biebmorávvagiid ja fáluid.