Home

Saemien Lohkemejarnge ovrehte göökte jaepieh barkeme orre nossemegærjine saemien maanide, Mov nossemegærja. Daelie gærja gaervies, jïh evteben bearjadahken jarngen barkijh dam gaervies gærjam gaahkojne heevehtin. Gærjan ulmie lea saemien maanah skreejrehtidh laavenjassh darjodh jïjtsh kultuvren bïjre.

- Dïhte mij sjïere Mov nossemegærjine, lea dorjesovveme saemien maanide. Dïhte dej aarkebiejjiem, gïelem jïh kultuvrem vuesehte. Gærjesne illustrasjovnh jïh laavenjassh aerpievuekien darjomi bïjre, goh gööleme, suejnieh tjoehpedh, jïh låavthgåetesne årrodh. Gærjan karakteerh saemien vaarjoeh utnieh guktie maanah maehtieh jïjtjemse damtijidh, jarngen åvtehke Karen Inga Eira jeahta.

Gærjan teemah leah doh saemien jaepieboelhkh, tjaktjen raejeste giesien raajan. Gærjesne aaj QR-kodah mah baejieh maanah saemien heamturh goltelidh.

- Vaenie learoevierhtieh gååvnesieh mah sjïehtedamme saemien maanagïertide jïh SAÖ:ide. Mijjieh sïjhtebe gærjam namhtah faaledh dejtie mah sijhtieh gærjam sijjen gïele jïh kultuvrebarkosne nuhtjedh. Mijjieh dan aavone jïh madtjele maehtebe daam nossemegærjam jeatjebigujmie juekedh, Karen Inga jeahta.

UNESCO prosjektem beetnehvierhtiejgujmie dåårjeme, jïh gærja golme gïeline dorjesovveme: noerhtesaemien, julevsaemien jïh åarjelsaemien. Maanagïerth jïh SAÖ:h maehtieh mijjine gaskesadtedh jis sijhtieh gærjam utnedh.

- Mijjieh geerve almetjh haestebe gærjam maanajgujmie ektine nuhtjedh. Soptsestidie guvviej bïjre, jïh baajede maanah jïjtsh baakoejgujmie soptsestidh maam vuejnieh, maam fïereguhte dorje, jallh mij dejnie ovmessie tsiehkine heannede. Nimhtie dïhte geerve almetje maahta maanan gïelem dåarjedidh, vuesiehtimmien gaavhtan gosse heannadimmiej bïjre illustrasjovnine soptsestieh, Eira jeahta.