Oahpahusdoaibma: Girjjit bookcreatoris

Dás leat iešguđet lágan girjjit mat čájehit mo oahpaheaddjit sáhttet hábmet girjjiid ohppiide ja mo oahppit sáhttet ráhkadit girjji. 

Beassášgirji - Ovdamearka mo sáhttá joavkobarggu čađahit bookcreatoriin. Dás leat oahppit jearahallan beassášfearániid rávisolbmuin, ieža hutkan beassášipmášiid, ohcan dološ beassášgovaid ja jearahallan makkár beassášplánat olbmuin lávejit leat. Dás leat ollu vejolašvuođat fágaidrasttildeaddji doaimmaide. 

Sánit váilot - Oahppi galgá guldalit lávlagiid ja fuomášit makkár sánit váilot. Girjjis lea álkis giella ja soaitá heivet ohppiide geain leat lohkan- ja čállinváttut. Dás lea dieđuske vejolaš oahpaheaddjis ráhkadit girjji nu váttisin/álkin go dárbbahuvvo.  Girji lea čállon sihke dáro- ja sámegillii. 

Veahkehat go min? - Girjjis leat emoji govat maidda oahppit galget ieža hutkat muitalusaid. Dás lea vejolaš heivehit barggu oahppi dássái. Girji lea čállon sihke dáro- ja sámegillii. 

Čiegus diehtu - Dás leat bustávaid sadjái boahtán Lego govat. Lea álkis cealkka mii girjjis lea ovdamearka, muhto oahpaheaddjis lea vejolašvuohta heivehit iežas ohppiid dássái. Girji lea čállon sihke dáro- ja sámegillii.