Home

Sáme låhkåmguovdásj la badjel guokta jage barggam sámegielak gåvvågirjijn, Muv gåvvågirjje. Åvdep bierjjedagá Sáme låhkåmguovdátja bargge ávvudin gáhkujn gå girjje l vijmak gárves. Girje ulmme l sáme mánájda måvtåstuhttet bargatjit dahkamusáj ma ietjasa kultuvrraj gulluji.

- Mij la sierralágásj Muv gåvvågirjijn la jut dat la ájnnasit sáme mánájda hábbmidum. Dat vuoset sijá árggabiejvev, gielav ja kultuvrav. Girjen li tjuorgastagá ja dahkamusá ma vuosedi árbbedábálasj dåjmajt, duola degu guollimdåjma, suojnnim ja nammadusá låvdagoaden. Karaktiera girjen adni sáme biktasijt, nav vaj máná máhtti ietjasa identifisierit girjen, javllá Sáme låhkåmguovdátja jådediddje Karen Inga Eira.

Girje tiemá li sáme jábijda hiebaduvvam, tjaktjagieses gæssáj. Girjen li aj QR-kåvdå gånnå bæssá báddidum subttsasijt gulldalit.

- Gávnnuji binná oahppamnævojs ma li hiebadum sáme mánájgárdijda ja skåvlå asstoájggeårnigijda. Danen sihtap dáv girjátjav nåvku fállat sidjij gudi sihti dáv adnuj válldet ietjasa giella - ja kultuvrrabargguj. Mihán ja ávon lip gå bessap dáv girjátjav fállat, javllá Karen Inga.

UNESCO l prosjevtav ruhtadam, ja girjje l tjáledum gålmmå sáme gielajda; nuorttasámegiellaj, julevsámegiellaj ja oarjjelsámegiellaj. Mánájgárde ja skåvlå asstoájggeårniga máhtti diededit mijáv jus sihti oadtjot girjev ietjasa institusjåvnnåj.

- Mij ávttjip ållessjattugijt ságastit mánáj gåvåj birra, ja dibddet mánájt ietjasa bágoj subtsastit majt sij vuojnni, mij dahpaduvvá jali gut dahká mav. Dán láhkáj máhttá ållessjattuk doarjjot mánáv gielalattjat, duola degu subtsastit ma gåvåjn vuojnnuji, javllá Eira.