Kursa
Kurssafálaldagá
Fállap kursajt, vaddep rádijt ja bagádallamijt, ma li hiebadum sierraláhkáj mánnágárdde- ja vuodoskåvllådássáj, valla ájggop aj fállagoahtet rádijt ja bagádallamijt joarkkaskåvllådássáj.
Dá temá soajtti liehket dábálasj låhkåm- ja tjállemåhpadus sámegiellaj, jali ihkap sierraláhkáj guoradallat sierra temájt ma ássjáj gulluji, dagu dal temá ma doarjju låhkåm- ja tjállemåhpadusáv.
Jus diján li ietjá sávadusá gå dá ma dánna li nammadum, de válde aktijvuodav mijájn ja rávvi kursajt, vaj oadtjobihtit máhtudagájt majt dárbahihpit. Kursa soajtti vihpat dåssju nágin
tijmav, jali aj nágin biejvev.
Kurssaoajvvadusá
- Mánáj njálmálasj giellaåvddånibme
- Gárvvánit lågåtjit ja tjálátjit
- Álggolåhkåm ja –tjállem – gåktu barggat mánájskåvlån
- Låhkåmstrategija – gåktu ávkken adnet låhkåm- ja tjállemmáhtudagáv
- Gåktu barggat låhkåmijn ja tjállemijn alep dásijn
- Gåktu måvtåstuhttet sámegiellaj tjálátjit
- Gåktu le guovtegielak mánáj giellaåvddånibme
- Digitála oahpponævo/oahppamresurssa
