Buohtastáhttit guokte gova dahje dávvira.
Ulbmil dainna bargguin lea ahte oahppit besset atnit máŋggalágan doahpagiid bagadaladettiin. Oahppit šaddet atnit doahpagiid mat muitalit govaid sisdoalu hámi, ivnniid, lohkosániid ja mat dat leat diŋggat govas. Oahppit šaddet maid atnit earet eará dadjanvugiid mat čilgejit iešguđet áššiid nugo sturrodagaid, loguid, meriid ja šaddet atnit post- ja preposišuvnnaid.
Juoge ohppiid joavkkuide. Juohke joavkkus galggaše leat gaskkal 2 – 4 oahppi. Dan barggus oahppi galgá geahččalit bagadallat goappá gova birra muitala, ja eará oahppit joavkkus galget guldalit ja loahpas árvidit makkár gova birra muitala. Oahppi ferte muitalit erohusaid dan guovtti govas. Hástal ohppiid čilget nu ahte ii šatta beare álki árvidit guđe gova birra muitala. Sáhttá hástalit garvit atnit sániid mat muitalit dalán guđe gova birra hupmá. Dás vuollelis gávnnat golbma gova maid sáhttá atnit, dahje sáhttá gávdnat govaid ovttas.no neahttasiiddus dahje pixabay neahttasiiddus. Govat leat ráhkaduvvon goansttajirpmiin Canva neahttasiiddus.
Sáhtát dán plakáhta vuođul álggahit ságastallamiid govaid ektui.
Viežžan inspirášuvnna: https://xn--sprkhjerte-35a.no/tips-til-a-jobbe-med-ord-og-begreper/
Dá leat guokte gova. Árvit goappá govvii dát čilgehus gullá.
Govas maid lean válljen leat golbma máná. Sii leat olgun stoahkame. Olgun lea dálvi, orru skábma. Almmis lea guovssahas. Guovssahasas lea ruoná ja fiskes ivdni. Almmis leat násttit. Oainnán muoraid, beziid. Duogážis lea duottar. Okta mánná lea lokten goappaš gieđaid áibmui. Dán mánás leat ruškes soajit báiddis ja ruoná healbmi. Nuppi mánás lea ruoná bivttas ja goalmmádis lea oránša bivttas. Goappá gova lean válljen?
