Govva-speallu
Viečča Junior Alias-spealu ja spellet dan. Ulbmil Alias-spealus lea čilget gova mii lea goarttas. Ovdamearkka dihte jus goarttas lea spiinni govva, de galgá čilget spiinni. Sáhttá čilget hámi dahje masa dábálaččat adno.
Junior Alias-speallu lea speallu mas leat govvagoarttat maid galgá nubbi čilget ja nubbi galgá árvidit. Luohkálánjas sáhttet dán speallat guovttes ja guovttes, smávit joavkkut dahje olles luohkká fárrolaga. Jus ii leat Junior Alias, de lea vejolaš dán speallat eará govvagoarttaiguin, dego njelješgoarttaiguin, goallossátnegoarttaiguin, mu vuosttaš lottu spealuin dahje eará govaiguin. Nuvttá govaid gávnnat neahtas, ee. www.ovttas.no neahttasiiddus. Doppe sáhtát sirret šlája mielde, go deaddilat "Govat" ikovnna, dahje sáhtát ohcat ohcansáni vuođul. www.pixabay.com neahttasiiddus maid gávnnat nuvttá govaid juohke fáttás.
Ovdalgo spillegoahtá de sáhttá ohppiiguin bargat doabatabeallain. Doabatabealla gávnnat dás giellabálgát neahttasiiddus. Sáhttá sirret govvagoarttaid ovdamearkka dihte hámiid, ivnniid, elliid, fievrruid dahje muhtin dihto fáttá vuođul.
Oahpasnuvvat njuolggádusaide
Ovdagihtii gánnáha fárrolagaid oahpásnuvvat njuolggadusaide. Dá leat soames njuolggadusat maid birra sáhttá ovdagihtii muitalan:
1. Go speallá, de galgá sámástit.
2. Mii speallat vuoruid mielde. Okta čilge, earát árvidit. Go leat árvidan riekta, de lea nuppi vuorru čilget. Ii fal dan vuorru gii lea árvidan, muhte su guhte čohkká su guoras.
3. Okta čilge maid oaidná govas. Earát galget dan botta guldalit ja árvidit.
4. Ovdagihtii šiehttat man guhka beassá ovtta govvagoartta čilget ja árvidit.
5. Ii leat lohpii atnit sáni mii lea govvagoarttas. Sáhttá ovdamearkka dihte čilget ahte ii leat lohpii dadjat ahte lea biila mii viežžá boasta, go lea boastabiilla birra sáhka. Ferte čilget eará ládje. Sáhttá de baicce dadjat ahte lea fievru mii adno dihto barggu oktavuođas. Fievrrus lea dávjá rukses ivdni ja doalvu reivviid olbmuide.