Ráhkadit doabahárjehallan plakáhtaid
Ulbmil dainna bargguin lea ahte oahppit besset atnit máŋggalágan doahpagiid bagadaladettiin. Oahppi beassá hárjehallat atnit sihke vuolit- ja bajiiddoahpagiid, ja beassá hárjehallat doahpagiid bokte čilget ja govvidit beatnaga ja guovllu gos lea láhppon. Oahpaheaddji sáhttá heivehit ja rievdadit barggu fáttáid ektui.
Oahppit galget ráhkadit plakáhta mas ohcala beatnaga mii lea láhppon. Plakáhtas galgá čállit ja čilget beatnaga hámi, gos lea láhppon, goas lea láhppon, nama ja muđui dovdomearkkaid. Sáhttá ovdamearka dihte čállit leago das čeabetbáddi, mihtilmas guolga dahje eará earenomáš dovdomearkkat.
Oahpaheaddji sáhttá ovdagihtii čálihit tearbmalisttu mas beatnatnamat dahje girjjáža mas leat sihke beatnatnamat ja čilgehusat beatnaga lihkastagaide ja hámiide. Dain sáhttet oahppit ohccát dieđuid go galget deavdit plakáhtaid. Sihke girjjáš ja tearbmalisttu leat biddjon mildosiin dán siidui.
Mu láhppon beana
Hápmi: Stuora čáhppes njealječalmmat beana mas leat luŋke bealjit (bealjit heaŋgájit). Hui njárbes ja oanehis guolga. Ruškes ivnnat raddi ja ruškes guolga maŋŋejulggiin gaccaid bokte.
Dovdomearkkat: Fiskes čeabetbáddi mas heaŋgá gilkor. Gilkoris lea beatnaga namma ja čujuhus.
Gos ja goas lea láhppon: Beana lei ruovttus beatnatáiddis. Ruovttu čujuhus lea Vielppisluodda 56. Soaitá njuiken áiddi badjel. Láhppon iđđesbeaivvi, disdaga skábmamánu 5. beaivvi.
Beatnaga namma: Luvke
Gáldut: