Lohkat govvagirjji mánáidgárddis
Lea dehálaš boktit sáhkkiivuođa ja lohkanmovtta ovttas mánnájoavkkuin ovdal go lohkagoahtá ovtta girjji. Geahčadit govaid ja ságastallat veahá maid mánát oidnet govain ja maid sii jáhkket dáhpáhuvvá, hukse vuordámušaid girjji sisdollui. Seammás beassá rávisolmmoš čilget sániid maid mánát eai soaitte dovdat ovdalaččas, ovdal go álgá lohkat girjji. Go hástala mánáid muitalit maid sii oidnet govain, de dat nanne máná muitalandáiddu ja áicilvuođa, ja nu maid hukse sáhkkiivuođa muitalussii.
Go mánáide áigu ođđa girjji lohkat, de berre álggos ságastallat girjji nama ja ovdasiiddu birra, ja jearrat man birra jáhkket mánát ahte dát girji sáhttá leat. Dasto geahčadit ovttas govaid juohke siiddus. Unnimusaide ferte divvut gažaldagaid, konkrehta dahje álkin, nugo: “Maid Biret bargá?” Lea rávisolbmo gažaldat mii hábme mánáid muitaleami, ja go lea buori álggu ožžon ságastallamii, de sáhttá jearrat rabas gažaldagaid, nugo “Mii dán govas oidno?” Dalle besset mánát muitalit juste maid sii oidnet.
Dávjá mánát fuomášit eará detáljaid go rávisolbmot ja ságastallama sáhttá mánáid fuomášumiid vuođul hukset viidáset. Go jearrá maid mánát jáhkket, dahje jurddašit dahje maid sii oaivvildit, de besset mánát iežaset sániiguin muitalit ja dasa leat mánáin dávjá buorit vástádusat. Maid jáhkket mánát geavvá? Maid son diet olmmoš dien govas jurddaša? Sáhttá máid jearrat konkrehta ahte makkár mielas leat mánát govain, orrogo sis somá vai orrot go ballame, dahje leago váivi? Ja joatkit sága: “Manne son nu?” Hástal mánáid muitalit maid sii oidnet govain ja maid sii jurddašit dan birra. Ná mánát hárjehallet muitalit iežaset jurdagiid, hukset cealkagiid, sojahit sániid ja báhkkodeami, ja ovdánahttet muitalandáidduideaset. Mánát maid dáinna lágiin hárjehallat guldalit maid eará mánát oaivvildit dahje masa sii leat bidjan fuomášumi govain, ja nu veahá suokkardit movt eará olbmot jurddašit.
Go ovtta siiddu birra leat muitalan de lea vuogas jearrat “Movt son de geavvá?” ja mánát hutkagohtet viidáset muitalusa, go fuomášit ahte muitalus jotkojuvvo boahtte siiddus. Gažaldat maid buktá vuordámuša muitalussii ja doalaha sáhkkiivuođa girjii ektui.
Jus mánát roahkkasaddet go galget hupmat govaid birra, eai gávnna sániid, de ferte rávisolmmoš muitalit, namuhit namain diŋggaid dahje dáhpáhusa mii oidno. Ii leat áhpu jearrat mánás, jus navdá ahte mánná ii dovdda daid sániid mat gullet govvii dahje dáhpáhussii. Go mánáide čilgejuvvo govaid bokte girjji sisdoallu, de lea maid álkit mánáide čuovvut mielde muitalusas go de sii dovdet daid sániid ja ipmirdit mii girjjis dáhpáhuvvá. Mánát masset beroštumi girjái jus leat beare olu amas sánit, ja eai nagot čuovvut sisdoalu girjjis. Danne berre ovdagihtii čilgen doahpagiid mat sáhttet leat apmasat girjjis.
Go lea lohkan girjji gitta lohppii, de sáhttá humadit ahte leigo nu go ovdal jurddašeimmet. Sáhttá mannat fas ruovttoluotta govaide, álggu rájes geahčadit, mii oidno govain mii muitalusas dáhpáhuvai, muittohallat muitalusa oktii vel. Hástal mánáid muitalit ja geardduhit girjji sisdoalus govaid bokte. Jeara masa mánát liikojedje buoremusat muitalusas. Lei go mihkkege ilgat? Dahje somá? Leat go mánát vásihan seamma goassege go muitalusas? Divo gažaldagaid jus mánáin orru miella eambbo hupmat, muhto lea maid ortnegis jus eai šat gille hupmat dan girjji birra eambbo maŋŋel go leat geargan.