Joavkobargu: Čállit čoahkkáigeasu dahje ráhkadit plakáhta
Daid bargguid vuođul galgabehtet oahpásnuvvat sihke mánáidgárdeláhkii, mánáidgárddi rámmaplánii, ILO konvenšuvdnii ja ON mánáidkonvenšuvnnain. Loahppaboađus galgá leat oanehis čoahkkáigeassu sámi mánáid rivttiin go leat mánáidgárddis. Sáhttibehtet čoahkkáigeasu ráhkadit plakáhttan dahje heŋget seaidnái nu movt lea. Ovdamearka dihte boddolatnji dahje ossodagaide.
Jus leat akto, de vállje ovtta stivrendokumeantta mainna barggat. Jus lehpet joavkkuin, de juohkibehtet ovtta dahje guokte stivrendokumeantta guđege jovkui.
Bargobihtát:
- Mii galgá leat mánáidgárddi ulbmil sámi mánáid ektui?
- Makkár sisdoallu galgá mánáidgárddis leat, mii nanne sámi mánáid sámegiela?
- Makkár rievttit leat sámi mánáin giellageavaheami ektui?
- Galgágo mánáidgárdi virgáibidjat sámegielat bargi go mánáidgárdái álgá sámegielat mánná?
- Leago gostege namuhuvvon makkár ovttasbargu galgá leat gaskkal ruovttu ja mánáidgárddi go sámegielat mánná álgá mánáidgárdái?
- Makkár mielváikkuhanriekti lea sámegielat mánáin iežaset giellageavaheami ektui?