Juovlamánu 4. beaivi

Ráhkat vihtta cealkaga tekstii maid leat lohkan. Dahje loga juoppá dáin teavsttain ja ráhkat das cealkagiid:

Teaksta 1: 

Gánda ii háliidan skuvlii vuolgit

Muhtumin lei gánda gii ii háliidan skuvlii vuolgit. Áhkku válddii rissi. Risse gándda, gánda ii vuolgge skuvlii. In risse, rissi logai. Áhkku manai dola lusa. Boaldde dan rissi, rissi ii dáhto gándda risset, ja gánda ii vuolgge skuvlii. In boaldde, dolla logai. Áhkku manai čázi lusa. Jáddat dan dola, dolla ii dáhto rissi boaldit, rissi ii dáhto gándda risset, ja gánda ii vuolgge skuvlii. In jáddat, čáhci logai. Áhkku manai vuovssá lusa. Juga dan čázi, čáhci ii dáhto dola jáddadit, dolla ii dáhto rissi boaldit, rissi ii dáhto gándda risset, ja gánda ii vuolgge skuvlii. In juga, vuoksá logai. Áhkku manai njuovvi lusa. Njuova dán vuovssá, vuoksá ii dáhto dola jáddadit, dolla ii dáhto gándda risset, ja gánda ii vuolgge skuvlii. In njuova, njuovvi logai. Áhkku manai bátti lusa. Čana dán njuovvi, njuovvi ii dáhto vuovssá njuovvat, vuoksá ii dáhto čázi juhkat, čáhci ii dáhto rissi boaldit, rissi ii dáhto gándda risset, ja gánda ii vuolgge skuvlii. In čana, báddi logai. Áhkku manai roahtu lusa. Gáskke dán bátti, báddi ii dáhto njuovvi čatnat, njuovvi ii dáhto vuovssá njuovvat, vuoksá ii dáhto dola jáddadit, dola ii dáhto rissi boaldit, rissi ii dáhto gándda risset, ja gánda ii vuolgge skuvlii. In gáskke, roahttu logai. Áhkku manai bussá lusa. Bora dán roahtu, roahttu ii dáhto bátti gáskit, báddi ii dáhto njuovvi čatnat, njuovvi ii dáhto vuovssá njuovvat, vuoksá ii dáhto čázi juhkat, čáhci ii dáhto dola jáddadit, dolla ii dáhto rissi boaldit, rissi dáhto gándda risset, ja gánda ii dáhto skuvlii vuolgit. Boran gal, bussá logai. Bussá fallehii roahtu, roahttu gáskkii bátti, báddi čanai njuovvi, njuovvi njuovai vuovssá, vuoksá jugai čázi, čáhci jáddadii, dola, dolla bolddii rissi, rissi rissii gándda, ja gánda dat gal maid čuskii skuvlii. Vuoksá=burru. Čusket=doapmalit.

Gáldu: Helander, Liisa & Guttorm, Anna Liisa 1996: Áhkku muital munnje. Kárášjohka: Davvi girji.

Teaksta 2 : 

Dás muitaluvvo veháš garra dálkkiid ja johtima birra badjel duoddara

Dat gale lea bahá johtit, go lea muohtaguoldu duoddara badjel jođidettiin. – Ja siida johttái ja de álgá guhkes johtolagaid johtit. Ja doppe lea goitge čoaskkis,  vaikko leage buorre dálki. Ja de šattai nu čoaskkis ja guoldu ja nu garas biegga, ahte bálkkui herggiid veallut ja nođiid eret herggiid nalde. Ja riidejeaddji mánát bahámusat galbmoje, ja váibe nu ahte eai šat bisson hearggi nalde. Ja gieđat leat galbmon nu ahte eai nagat doallat spahkáoivviin gitta. Ja dat boares olbmot, mat ledje 80 jagi boarrásat, sii leat vuoimmehuvvan ja sis leat heajut čalmmit, ja sii eai nagat vázzit nu ahte jođále johtti siiddas, ja sii váibetnai nu ahte eai veaje guhkes beaivásiid vázzit ovttatmanus. Ja de sii fertejit orrut ija meahcis ja eai oaččo dolage muhtumin, ja vaikko vel oččolege ovtta dola, eai sii veaje skirriid gaikut nu olu, ahte bistá olles ija dolla, ja sii dalle galbmojit nu ahte goase heagga manná. Ja go lea velá garra dálki, de lea velá bahát, ja dasa ii leat goansta ii miige, ii nagat heargi guoddit  iige olmmoš.

Ja go siida luoitala dasa, gos lea vehᡚ skierri ja boazoealát, de nissonat njamahit mánáid ja stuorit váiban mánái govččadit vai eai galbmo. Go leat olu njuorahat mánát, de sii čirrot nu olu go nagadit, muhto ii ávtte, sii fertejit orrut gietkamis. Ja stuoribut maid čirrot, go lea čoaskkis. Ja beaivvis lea áigi ja mannjit, sevnnjodeame, ja das lea váibbasvuohta ja hoahppu; gaikut skirriid muhtumat ja nuppit goađi dahkat ja gálvvuid bidjat čoahkkái. Ja dat muorra lea nu heittet, hate ii oaččo dola muđui go ráhpot datnjasiid siste - ja vánis velá datge. Ja go dola ožžot, dalle lea hoahppu nissoniin nuollat gietkkamánáid ja dikšut deid. Ja iežát ráhkadit biepmuid, ja go leat biepmut ráhkadun, de borret. Ja de dat, mat leat ealu vuojeheaddjit, buktet ealu goađi lusa livvii,  ja de vulget fas iežát ealu reainnidit, ja lea jo seavdnjat idja. Ja sii guođohit dasságo šaddá nubbi beaivi ja de vuojehit goađi lusa ja de johttájit fas dakkaviđe. Muhto johtet sii fal hoahpus, go ollejit daid bahámus duoddariid badjel, vai ii jovssa garra dálki.

Ja dološ áiggiid lei buorre orrut juohke báikkis, go leai buorre jeagil. Ja sii orro duoddariid naldenai, gos lei veháš skierri, dainna go duoddara nalde lea lodji boazu. Doppe leai álki bohčit áldduid, ja sii dološ áiggiid olu bohče. Muhtun oassi sámiin, dat geain leai unnán eallu, sii ferteje bohčit mielkki biebmun, go ii lean iežá biebmu go mielki ja biergu. Ja sii bohče gale nu garrasit geasset, ahte šattai boazovihki juohkelágáš. Dat garra boazodávda gal gottii olu bohccuid, ja dat leai velá dakkárnai ahte darvánii dego iežánai darváneaddji dávda; jos mastaldejde dakkár siiddain mis dávda, de darvánii luottainnain. Ja dat siiddat, main ii lean vihki, dat balle dan siiddas geas leai vihki, ja garve guhkkin doaresbeali. Ja báhkka gesiid dat leai bahát vihki, dalle jámii nu olu ahte eai ollen náhkiidge njuovvat visot, vaikko njuvve čuohteviisan, ja biergu ii borahan go jur soames bohccos. Ja deinna sii bisso geafin, dat geat ledje nu garrasat bohčit. Ja dat dávda lea dakkár ahte bohccuid gaccat šluppagit ja sidjot, ja sarváin bohtanit guoccagat daihe čahkarat, ja áldduin rubbot čiččit ja misiin rubbot njunit.

Gáldu: Muitalus sámiid birra. Johan Turi. 1910. Sámi Girjjit 1987.