Álgosiidu

Sámi lohkanguovddáš lea badjel guokte jagi bargan sámegielat buđaldangirjjiin, Mu buđaldangirji. Mannan bearjadaga ávvudedje Sámi lohkanguovddáža bargit gáhkuin go girji lea viimmat válbmanan. Girjji ulbmil lea movttiidahttit sámi mánáid čoavdit bargobihtáid mat gullet iežaset kultuvrii.

- Dát mii lea earánoamáš Mu buđaldangirjjiin lea ahte dát lea ráhkaduvvon sámi mánáide. Dát speadjalastte sin árgabeaivvi, giela ja kultuvrra. Girjjis leat illustrašuvnnat ja bargobihtát mat čájehit árbevirolaš doaimmaid dego guolásteapmi, suidnen ja lávostallan. Girjji karaktearain leat maid sámi gárvvut, nu ahte mánát sáhttet iežas identifiseret girjjis, muitala Sámi lohkanguovddáža jođiheaddji Karen Inga Eira.

Fáttát leat jahkeáigodagaid mielde heivehuvvon, čakčageasis geassái. Girjjis leat maiddái muhtin QR-kodat mas beassá guldalit jietnabáddejuvvon sámi muitalusaid.

- Dát eai buvttaduvvo nu ollu oahpponeavvut mat leat heivehuvvon sámi mánáideagárddiide ja skuvlla astoáiggeortnegiidda. Mii háliidit danne dán girjji fállát nuvttá mánáidgárddiide ja skuvlla astoáiggeortnegiidda geat sávašii dán váldit atnui giella ja kulturbarggus. Mii leat hui rámis ja ilus go mii beassat fállat dán girjji, dadjá Karen Inga.

UNESCO lea ruhtadan prošeavtta ja girji lea čállon golmma sámegillii sihke davvisámegillii, julevsámegillii ja lullisámegillii. Mánáidgárddit ja skuvlla astoáiggeortnegat sáhttet minguin váldit oktavuođa jus háliidit girjji sin ásahussii.

- Mii ávžžuhit rávisolbmuid humadit govaid birra ovttas mánáiguin ja oažžut mánáid muitalit iežaset sániiguin maid sii oidnet, mat doppe leat dahje gii bargá maid, ja ahte rávisolmmoš doarju máná gielalaččat, ja namuha mii govain oidno, muitala Eira.   

Diŋgo girjji

Mánáidgárddit ja astoáigeortnegat sáhttet diŋgot girjji nuvttá go sáddejit e-poastta čuovvovaš čujuhussii: lohkanguovddas@samas.no

Čále e-poasttas makkár gillii háliidat girjji, juogo davvisámegillii, julevsámegillii dahje lullisámegillii. Čále maiddái galle girjjit háliidat.