Home

Gulldalit ja duodjuhit – jieddnáslåhkåm Ájluovtan ja Bådådjon

Maŋemus vahko gålgådismánon la sáme giellavahkko. Sáme låhkåmguovdásj aktan Hábmera girjjevuorkájn ja Stormen sáme guovdátjijn gåhttju ulmutjijt boahtet gulldalittjat ja duodjuhittjat.

Dán jage ásadip “Gulldalit ja duodjuhit” sihke Ájluovta girjjevuorkkáfiliálan Hábmerin ja Stormen girjjevuorkán Bådådjon. Válde lådågav, gådågav jali ietjá duojev fáron ja boade gulldalittjat subttsasijt Anders Urheima girjes “Buojddedågge, buojddedågge” ja Kurt Tore Andersena girjes “Gå skirri sádá”. Girjjevuorkká guossot káfav ja tiejav aktan svarkajn.

Ájluovtan: Mánnodagá 25.10 kl. 19.00 gåhttju Sáme låhkåmguovdásj ja Hábmera girjjevuorkká hávsskes båddåj Ájluovta girjjevuorkkáfiliálan. Duodjuhahttijn besa gulldalit gå Anne Silja Turi låhkå.

Bådådjon: Sådnåbiejve 31.10 kl. 14.00 gåhttju Sáme låhkåmguovdásj ja Stormen sáme guovdásj hávsskes båddåj Stormen girjjevuorkán. Duodjuhahttijn besa gulldalit gå Siri Nystø Ráhka låhkå.