Home

Daelie göökte orre åarjelsaemien gærjah maanide riejries!

Saemien lohkemejarnge jïh Christine Rensberg gærjaprosjektine laavenjosteme. Daate Rensbergen mubpien gærja prosjektesne, Nejpien Faamoe. Erika Jonsson gie saemien lohkemejarngesne barka lea aaj meatan prosjektesne jïh sov voestes gærjam tjaaleme, Sarvevijreme. Prosjekte edtja gærjah saemien aerpievuekien bïjre darjodh. Håhkesjibie gærjah maanide skreejrieh gærjah lohkedh jïh goltelidh jïh seamma sienten saemien aerpievuekien bïjre lierieh. Gærjah learoehkidie 1-4 daltesisnie sjiehtieh, men gærjah aaj jeatjah aalteredåehkide sjeahta.

Nejpien faamoe

Matteo oktegh gåetesne jïh ov-murrede. Idtji daejrieh maam edtjh darjodh. Aahka gonnoeh aajjan gåajkoe guessine mïnni jïh dejgujmie soptsesti jïh jïjnjem lïeri. Lohkh gærjam jis sïjhth saemiej vuekieh staelien bïjre lïeredh.

Christine Rensberg, Guvvieh: Aino Danielsen

Sarvevijreme

Daate gieltegs soptsese baernien bïjre mij edtja voestes aejkien meatan årrodh vijredh. Meehte edtja aehtjiem jïh aajjam vaaran dåeriedidh jïh bïenje Tjabpe aaj meatan. Meehte aavode, gieltegs sjædta! Men sarvh vaeresne gååvnesieh? Jïh man åvteste vihkeles aajjam goltelidh?

Erika Jonsson, Guvvieh: Niklas Blindh

Berteme: Davvi girji

Beetnehdåarjoe: Nöörjen Saemiedigkie

Gærjah gåaradieh Raasten Rastah festivaalesne Plassjesne daan hïeljen 26-27/9 2025 åestedh, jïh Davvi Girjin tjïrrh.