Hjem

Gaskadási čállingilvu lea loahpahuvvon ja vuoitit leat vuorbáduvvon. Son gii vuittii lohkanbreahta vuorbádeamis lei guđat luohka bárdni Johan Áslat Oskal Guovdageainnu mánáidskuvllas. Son lei čállán juoŋasteami birra.

Gaskadási čállingilvui lea Sámi lohkanguovddáš lágidan movttiidandihte mánáid ja nuoraid čállit sámegillii. Čállingilvui bohtege dán háve oktiibuot 37 čállosa ja oktiibuot leat oassálastan 37 oahppi gilvvus. 18 bártnáža ja 19 nieiddaža. Gilvui bohte 7 lullisámegiela čállosa iige oktage čálus boahtán julevsámegillii. Loahppa 30 čállosa ledje davvisámegillii.

Sámi lohkanguovddáš lea čálliin jearran lobi almmuhit čállosiid. Eatnasat leat addán lobi almmuheapmái. Čállosiid almmuhit dasto Ávvira mánáidsiidduin.

Sámi lohkanguovddáš lea hui giitevaš nu oallugat leat searvan gilvui ja sávvát ain ovddosguvlui lihkku čállimiin čállingilvvu oasseváldiide.