Ovttas / Aktan / Aktesne oahpponeavvoportála

Ovttas|Aktan|Aktesne lea neahttabáiki masa leat čohkkejuvvon sámegiel oahpponeavvut. Oahpponeavvoportála váldoulbmil lea juohkit dieđuid buot sámegiel oahpponeavvuid birra ja buot sámi oahpahusa várás dahkkon oahpponeavvuid. Das leat golbma doaimma: Vuosttaš lea juohkit dieđuid  iešguđetlágan oahpponeavvuid birra mat heivejit sámi mánáidgárddiide, sámi vuođđoskuvlii ja joatkkaskuvllaid oahpahussii. Nubbi doaibma lea juogadanarena, mas oahpaheaddjit ieža sáhttet juogadit iežaset ráhkadan oahpponeavvuid earáiguin. Goalmmát doaibma lea fállat sámegillii digitála oahppanreaidduid.

Ovttasis gávnnat davvisámegiel, julevsámegiel ja lullisámegieloahpponeavvuid, ja maiddái máŋggagielat oahpponeavvuid. Don sáhtát daid ohcat máŋgga láhkái, ja sirredit vai gávnnat juste daid mat leat dan fáttá birra masa ozat oahpponeavvuid. Das sáhttá maid ohcat oahpponeavvuid mat heivejit dihto ulbmilii mánáidgárddi rámmaplánas dahje vuođđooahpahusa gealbomihttomeriide.

Oahpponeavvoportála duogášhistorjá lea ahte álggos lea leamaš oktasaš prošeakta gaskal Sámedikki ja Senter for IKT i Utdanningen. Dat prošeaktaáigodat bisttii 06/2010-06/2013. Prošeakta mearriduvvui šaddat bistevažžan, ja dan olis sirdojuvvui Ovttas-Aktan-Aktesne oktan njeljiin bargiin Sámi lohkanguovddážii 01.07.2013 rájes. Oahpponeavvoportála oaččui rámmajuolludusa bokte ruhtadeami Máhttodepartemeanttas 2018, ja oažžu maid Sámedikkis njuolggodoarjaga jahkásaččat.

Doibmii gullá maid diehtojuohkinbargu ja oahpahit geavahit bálvalusa iešguđetge osiid. Ovttas|Aktan|Aktesne bargit dollet kurssaid das movt sáhttá ohcat dieđuid Ovttasis, ja kurssaid movt oahpaheaddjit sáhttet juogadit iežaset ráhkadan oahpponeavvuid digitála juogadanarenas, ja ráhkadit digitála oahpponeavvuid.

Ovttasis leat maid robohtat maid mánáidgárddit ja skuvllat sáhttet luoikkahit vai besset daid geahččaladdat. Ovttasa bargit sáhttet maid doallat kurssa das movt robohtaid galgá programmeret, ja movt daid sáhttá geavahit oahpahusas. Dalle váldá oktavuođa singuin juogo telefovnnas dahje eboasttas. 

 

Oahpponeavvoportála golbma oasi:

  • Almmuhuvvon oahpponeavvuid bajilgovva, ja luoikkahanvejolašvuohta.
  • Juogadanarena
  • Digitála oahpponeavvuid almmuhanreaidu.

Ovttas| Aktan| Aktesne