skábmamánu 21. beaivi 2014

Álgosiidu

Kompass lea Sámi mánáidgárddiid veahkkebargiid ja fágabargiid gelbbolašvuođa lokte. Sámi lohkanguovddáš ja Sámi allaskuvla ovttas Finnmárkku Fylkkamánniin lágidit joatkkaoahpu, mainna Norgga sámegielat mánáidgárddiid veahkkebargit ja fágabargit sáhttet loktet gelbbolašvuođaset. Ohahpu ulbmilin lea loktet sámegielat mánáidgárddiid veahkkebargiid ja fágabargiid gelbbolašvuođa nu, ahte lasihit sin fágalaš gelbbolašvuođa ja máhtu doaibmat mánáidgárddi beaivválaš doaimmain ja ovdánahttinbargguin. Dasa lassin ulbmilin lea loktet veahkkebargiid ja fágabargiid dihtomielalašvuođa das, mo sii leat resursan ja makkár rolla sis lea mánáidgárddis.

Ohppui leat várrejuvvon 20 oahpposaji, ja dan lea vejolaš váldit juogo oahppoovttadahkan dahje osiid kursan.

Oahppoovttadat addá 15 oahppočuoggá, ja dasa gullá eksámen. Oahppoovttadat lea joatkkaoahppu. Finnmárkku fylkkamánni ruhtada oahpu. Jus oahpu osiid čađaha kursan, de das oažžu kursaduođaštusa.

Eaktuduvvo ahte suohkanat ja mánáidgárddit heivehit bargodili nu, ahte veahkkebargit ja fágabargit sáhttet oasálastit deaivvademiin ja čađahit bargogáibádusaid iežaset mánáidgárddiin. Eaktuduvvo maiddái, ahte mánáidgárdeeaiggát bagadallá veahkkebargi dahje/ja fágabargi.

Sisdoallu: Máhttoviidodaga fáttát leat  máná ovdáneapmi, guovttegielatvuohta ja stoahkan. Oahpus vuodjut máná ahtanuššamii ja gielalaš ja kultuvrraš ovdáneapmái, main deattuhuvvojit sámemánáid bajásgeassima earenoamášvuođat ja sámi oaidnu. Oahpus galget maiddái oahpásnuvvat mánáidgárdde stivrendokumeanttaide. Máhttoviidodaga geahččanguovlun leat sámi mánáidgárddiid ulbmilat ja doaimmat.

Ohcanáigemearri: 1.4.2015 – www.samas.no

Ulbmiljoavku: Veahkkebargit ja fágabargit geat barget sámegielat mánáidgárddiin Norggas.

Praktihkalaš dieđut:

Eksámen: vahkku 51/2015

Kursa/ oahpahus giella: Kursa/ oahppoovttadaga njálmmálašgiella lea sámegiella, muhto studeantta beassá válljet goappá gillii ovddida bargongáibádusaid.

Organiseren ja bargovuogit: Oahppu/kursa lea oasseáiggeoahppu ovtta semestera badjel ja das leat golbma geatnegahttojuvvon deaivvadeami, juohke deaivvadeapmi bistá 3 beaivve. Oahppovuohkin leat fysalaš deaivvadeamit, neahttaoahpahus, hárjehallan bargosajis ja bargobihtáid bargan. Fysalaš deaivvadeamit leat guokte, Sámi allaskuvllas Guovdageainnus (vahkku 36 ja 46) ja okta deaivvadeapmi čađahuvvo neahta bokte (vahkku 42). Vuosttaš deaivvadeapmi lea Sámi allaskuvllas Guovdageainnus vahkku 36 -2015.

Haddi: Kursadiva ii gáibiduvvo. Muhto jus oahppu váldo oahppoovttadahkan de šaddá oasseváldi máksit oahppodivvaga mii lea 700,- ruvnno. Dán hattis lea 400 Kr SSO (Sámi Studeanttaid Ovttastus) diva ja 300 Kr lea semesterdiva.

 

Sisaváldingáibádus:

Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga) dahje realagelbbolašvuohta. Sámegiela máhtu gáibádus lea ahte studeanttain lea sámegiela njálmmálaš giellamáhttu mainna bures gulahallet davvisámegiela bokte.

Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit njálmmálaš giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de lágida allaskuvla njálmmálaš giellageahččaleami.

 

Sisabeassangáibádus sáhttá maid  leat realagelbbolašvuohta ohcciide geain váilu lohkangelbolašvuohta muhto leat badjel 25 jagi boarrásat, unnimus 5 jagi bargohárjáneapmi gos unnimus 2 jagi lea mánáidgárddis ja njálmmálaš máhttu davvi sámegielas.

Ohppui dahje kursii oasálasti

Maŋŋel maŋemus deaivvadeami dahje maŋemuš mánu maŋŋel eksámena lea vejolaš ohcat gokčojuvvot oasi mátkkoštan- ja orrungoluin.

Jearaldagat KOMPASS birra ovddiduvvo Sámi allaskuvlii koordináhtora Randi Juusoi 78 44 86 24 dahje Finnmárkku Fylkkamánni, Kari Dale, 78 95 03 95.