Girjásj Sáme kultuvrradádjadus mánájgárdijn ja skåvlåjn

Mij la sáme kultuvrradádjadusá sisadno? Moaddása máhtti vásedit dav tjuolmman gåktu dajna tiemájn barggat. Majna hiehpá åhpadusán barggat dán gáktuj? Dálla l Sáme låhkåmguovdásj ja Nasjonalt senter for kunst og kultur i opplæringen almodam girjásj/girjásj mij mánájgárdijda ja skåvlåjda galgaluluj viehkken vaj sáme kultuvrradádjadus aj ienebut boahtá åvddån åhpadusán.

Artihkkalij vuođo l bájkálasj sáme kultuvrra. Sáme kultuvrra l girjak, ja gávnnuji ållo variasjåvnå bájkij ja guovloj milta. Mij sávvap åhpadiddje mánájgárdijn ja skåvlåjn dájna girjátja bargadahttijn máhtti aktan ájádallat ja ságastallat gåktu artihkkalij oajvvadusájt ja báhkoválljimijt máhtti hiebadit ietjasa bájkálasj kultuvrraj. Artihkkalijn li buorre oajvvadusá ja buojkulvisá gåktu ja majt mánájgárdijn ja skåvlåjn hiehpá dahkat sáme kultuvrradádjadusá gáktuj.

Maná artihkaltjoakkáldahkaj dánna jali lågå ienep:

Artihkkala:

• Birgit Andersen, jådediddje Vuonak mánájår­ruhin Divtasvuonan, la tjállám gåktu sáme gehtjastagájn máhttá barggat mánájgárdijn. Bieb­moj, duoje, subtsastime, luondo ja musihka baktu l ållo majt máhttá dahkat gå ájggu åvdedit sáme kultuvrradádjadusáv mánájgárdijn.
• Ælloniehkke ja biebbmoberustiddje Máret Rávdná M. Buljo tjállá sáme biebmoj ja árbbedábij birra álggoálmmukperspektijvas. Sån ávttji mijáv duola degu májnnot ja gijttet biebmoj åvdås, buoris­sjivnnjedit biebbmobáhtsudisájt ja sávvat buorre boahtteájgev! Mij lulujma galggat ietja tjoagget ja tjoahkkit ienep biebmojt luondos ja ienep oahp­pat sjattoj birra ietjama lahkabirrasin ja guovlon. Sån sihtá etihkalasj, guoddelis ja rájnna biebmov boahtteájggáj aj!
• Oarjjelsábme Maja Dunfjeld la duodjár ja dutke ja la dåktårgrádanis tjállám girjjusij birra. Dán artihkkalin tjielggi gåktu máhttep sáme árbbe­diedujn barggat mánájgárdijn ja skåvlåjn. Sáme árbbediedo milta li girjjusin guokta dåjma. Dat máhttá liehket hærvvan, valla danna l aj sierra mierkkidus jali sisadno.
• Åhpadiddje ja girjjetjálle Karen Anne Buljo vaddá buojkulvisájt gåktu mij sjuggelis láhkáj tiemájn máhttep barggat. Sån árvval gå mánná subttsa­sav ståhkagoahtá de la subtsas vuorbástuvvam. Gå sáme mánájn ælla sáme originála filma de la ájnas háhkuhit arienájt sidjij mijá ietjama kultuvra vuodon.
• Dåktårgrádastipendiáhtta Siri Nystø Ráhka sub­tsas Rádnastallama birra, mij la giellaprosjækta majt Divtasvuonan tjadádi. Rádnastallam la asstoájggedoajmma mánájda ja nuorajda sáme­giellaj. Dan artihkkalin li oajvvadusá dåjmajda ma sámegielav suohtas vuoge milta åvdedi.
• Koreográffa, filmmaregisørra ja dánssár Elle Sofe Sara oajvvat gåktu dánsajn máhttá mánájgárden ja skåvlån barggat. Sån tjielggi mij dánssa l, manen ja gåktu dánssat. Sáme dánssa l ådå buojkuldahka ja dav la ájnas gaskostit åhpadusán, vaj mijá guovloj moattebelakvuohta aj boahtá vuojnnusij.
• Åhpadiddje Lisbet Hansen ja UiT Norges ark­tiske universitiehta matematihkka profæssur ja Sáme allaskåvlå profæssur II matematihkan Anne Birgitte Fyhn libá tjállám gåktu Unjárga åhpadagán li doaresfágalasj bargujn barggam 1.-2. dásen matematihka gáktuj. Dán tjállusin tjielggiba guoradalle åhpadimgárvvidusáv, masi moadda fága li tjanáduvvam.

Girjásj dálla almoduvvá julevsámegiellaj ja dárogiellaj. Girjásj la dokumentan vuollelin jali næhttabielen: dánna.