Hjem

Sámi lohkanguovddáš ja Oahpahusdirektoráhtta leat vuolláičállán šiehtadusa  ovdánahttit ja čuovvolahttit nationála geahččalemiid ja kártengeahččalemiid sámegiela lohkamis, mas Sámi lohkanguovddážis lea ovddasvástádus ovdánahttit geahččalemiid. Šiehtadus galgá leat mielde nanneme sámi ohppiid oahpahusa kvalitehta.

Gaskavahku 25. beaivvi njukčamánu ledje Oahpahusdirektoráhta ovddasteaddjit galledeamen Sámi lohkanguovddáža. Dán oktavuođas vuolláičállojuvvui šiehtadus mii addá Sámi lohkanguovddážii ovddasvástádusa ovdánahttit nationála geahččalemiid ja kártengeahččalemiid sámegiela lohkamis.

– Lea hui dehálaš ahte sámegiella ja sámi konteaksta lea vuolggasadji geahččalemiin maid geavahit vuođđoskuvllas. Dán ovttasbarggu oktavuođas sáhttit mii ovdánahttit relevánta árvvoštallanreaidduid mat láhčet dili dásseárvosaš árvvoštallamii, muitala Marit Breie Henriksen, gii lea Sámi lohkanguovddáža sadjásaš jođiheaddji.

Oahpahusdirektoráhtta maid deattuha ovttasbarggu mávssolašvuođa.

– Mii leat hui ilus dáinna go sáhttit Sámi lohkanguovddážii addit dán doaimma. Mis lea leamaš buorre ovttasbargu Sámi lohkanguovddážiin máŋga jagi, ja mii illudit ain joatkit dáinna ovttasbargguin, muitala Frode Nyhamn, Oahppodirektoráhta geahččaleapmi- ja eksámenossodaga ossodatdirektevra.

Geahččaleamit leat ovdánahttojuvvon ohppiide geat ožžot sámegiel vuosttašgielaoahpahusa ja galget addit dieđuid ohppiid gelbbolašvuođa birra, ja seammás leat mielde ovddideame oahpahusa kvalitehta. Ovttasbargošiehtadus bidjá rámmaid dán bargui ja galgá viidáseappot nannet máhttovuođu. Soahpamuš bistá njeallje jagi, 2029 lohppii.

– Dát bargu galgá váikkuhit ahte oahpaheaddjit ožžot buoret reaidduid čuovvolit ohppiid sámegiela lohkanovdáneami. Dát lea dehálaš lávki viidáset barggus ovdánahttit sámi árvvoštallanreaidduid skuvllas, muitala Henriksen.