Mánáidgárdi ja smávvaskuvla

Filbma: Muitalus Zalla-álbmoga birra

Movt sáhttá lohkat sávzzaid jus gielas eai leat logut? Dán videos professor Anne Fyhn muitala movt Zalla-álbmot nagodii lohkat sávzzaid. (Filbma lea vuolemusas dán siiddus).

Čanastat matematihka oahppoplánii: Guovddášelemeanta Representašuvdna ja gulahallan

Representašuvnnat matematihkas leat vuogit ovdanbuktit matematihkalaš doahpagiid, oktavuođaid ja čuolmmaid. Representašuvnnat sáhttet leat konkrehta, konteavsttalaččat, visuálalaččat, verbálalaččat ja symbolalaččat. Gulahallan matematihkkafágas lea ahte oahppit geavahit matematihkalaš giela ságastallamiin, ákkastallamiin ja loahppajurdagiin. Oahppit fertejit beassat geavahit matematihkalaš representašuvnnaid iešguđet oktavuođain, iežaset vásáhusaid bokte ja matematihkalaš ságastallamiid bokte. Oahppit fertejit beassat čilget ja vuođuštit manne leat válljen vissis representašuvdnahámi. Oahppit galget máhttit jorgalit gaskkal matematihkalaš representašuvnnaid ja beaivválaš giela ja geavahit iešguđetlágan representašuvnnaid.

Čanastat mánáidgárddiid rámmaplánii: Fágasuorgi: Lohku, sadji ja hápmi

Fágasuorggis lea sáhka fuomášit, diđoštit ja hábmet struktuvrraid ja veahkehit mánáid áddet oktavuođaid luonddus, servodagas ja univearssas. Mánáidgárdi galgá čalmmustahttit oktavuođaid ja láhčit dili nu, ahte mánát sáhttet diđoštit ja fuomášit matematihka beaivválaš eallimis, teknologiijas, luonddus, dáidagis ja kultuvrras ja go ieža leat hutkái ja hábmejeaddji. Fágasuorgebargu galgá movttiidahttit mánáid imaštallama, sáhkkiivuođa ja motivašuvnna čuolmmaid čoavdit.

Fágasuorgi fátmmasta stoahkkás ja iskkadeaddji barggu buohtastahttimiin, rátkimiin, sajustemiin, orienteremiin, visualiseremiin, hámiiguin, minstariiguin, loguiguin, lohkamiin ja mihtidemiin. Lea maiddái sáhka jearaheamis, resonneremis, ákkastallamis ja čovdosiid ohcamis.

Reflekšuvdnagažaldagat:

• Movt diehtit leatgo buot sávzzat máhccan gárdái eahkedis? Maid gáddibehtet ahte álbmot dagai? Dán jearaldaga sáhttá addit mánáide ja diktit sin suokkardit dán.
• Movt heive bargat dáinna muitalusain din mánáiguin?
• Movt čoavdá čuolmma go leat eambbo go logi sávzza?

Bargu:

Ráhkat oahpahusdahkosa Zalla-álbmoga birra, ja geahččal dan mánáiguin. Muital mot manai.

Áigeplána:

13.05.2021-27.05.2021: Video almmuhuvvo Sámi lohkanguovddáža ruovttusiiddus, maid oahpaheaddjit ja bargit sáhttet ovttas geahččat, ja dasto geahččaladdat mánáiguin.

28.05.2021: Zoom deaivvadeapmi, gos mánáidgárddit ja skuvllat muitalit iežaset vásáhusaid birra

Čakčat 2021: Loahpahanseminára Diehtosiiddas