Álgosiidu

Maid sisttisdoallá sámi kulturáddejupmi? Oallugiidda soaitá leat čuolbman movt dainna fáttáin galgá bargat. Maid heive bargat dán ektui oahpahusas? Dál lea Sámi lohkanguovddáš ja Nasjonalt senter for kunst og kultur i opplæringen almmuhan gihpa/girjjáš mii galggašii mánáidgárddiide ja skuvllaide veahkkin vai sámi kulturáddejupmi maid boahtá eambbo ovdan oahpahusas.

Artihkkaliid vuolggasadji lea báikkálaš sámi kultuvra. Sámi kultuvra lea girjái, ja gávdnojit ollu variašuvnnat báikkiid ja guovlluid mielde. Mii sávvat ahte barggadettiin gihppagiin mánáidgárddiid ja skuvllaid oahpaheaddjit sáhttet ovttas smiehtadit ja ságastallat movt artihkkaliid árvalusaid ja sátneválljemiid sáhttá heivehit báikkálaš kultuvrii. Artihkkaliin leat buorit rávvagat ja ovdamearkkat movt ja maid bargat mánáidgárddis ja skuvllas sámi kulturáddejumi ektui.

Mana artihkalčoahkkáldahkii dás dahje loga eanet:

• Mánáidgárdejođiheaddji Birgit Andersen, Vuonak mánájåroj-mánáidgárddis Divttasvuonas, lea čállán movt sámi čalmmiiguin sáhttá geahččat mánáidgárddi. Biepmu, duoji, muitaleami, luonddu ja musihka bokte lea ollu maid sáhttá bargat ovddidan dihte sámi kultuvrra mánáidgárddis.
• Boazodoalli ja biebmoberošteaddji Máret Rávdná M. Buljo čállá sámi biepmu ja árbevieruid birra álgoálbmot vuolggasajis. Son ávžžuha min earret eará máidnut ja giitit biepmu ovddas, sivdnidit biebmobázahusaid ja sávvat buori boahtteáiggi! Mii galggašeimmet eambbo ieža gávdnat biepmu meahcis ja lasihit oahpu iežamet borramušaid birra lagasbirrasis ja guovlluin. Son háliida ahte mis lea ehtalaš, bistevaš ja ráinnas biebmu boahtteáiggis nai!
• Lullisápmelaš Maja Dunfjeld lea duojár ja dutki ja leage doavttirgráđastis čállán ornamentihka birra. Dán artihkkalis son čilge movt mii sáhttit sámi árbemáhtuin bargat mánáidgárddis ja skuvllas. Sámi árbemáhtus leat ornamentihkas guokte iešvuođa. Dat sáhttá sihke čikŋan dahje hearvan, ja das lea maiddái sierra mearkkašupmi.
• Oahpaheaddji ja girječálli Karen Anne Buljo addá midjiide ovdamearkkaid movt mii kreatiivvalaččat sáhttit bargat fáttáin. Son oaivvilda ahte go mánná álgá stoahkat muitalusa de lea muitalus lihkostuvvan. Go sámi mánáin eai leat sámi originála filmmat de lea dehálaš háhkat arenaid sidjiide min iežamet kultuvrras.
• Doavttirgrádastipendiáhtta Siri Nystø Ráhka muitala giellaprošeavtta Rádnastallam birra, maid Divttasvuonas čađahit. Rádnastallam lea sámegielat astoáigedoaibma mánáide ja nuoraide. Das leat evttohusat doaimmaide mat ovddidit sámegiela somás vuogi mielde.
• Koreográfa, filbmadahkki ja dánsu Elle Sofe Sara evttoha movt dánssain sáhttá bargat. Son čilge mii dánsa lea, manin ja movt dánsut. Sámi dánsa lea ođđa doaba ja dan lea dehálaš buktit oidnosii oahpahusas, vai min guovlluid máŋggabealátvuohta maid boahtá oidnosii.
• Oahpaheaddji Lisbet Hansen ja UiT Norgga arktalaš universitehta matematihkka professor ja Sámi allaskuvla professor II matematihkas Anne Birgitte Fyhn leaba čállán movt Unjárgga oahppogáldus leat bargan fágaidrasttideaddji bargguin 1.-2. ceahkis matematihka ektui. Dán čállosis čilgeba suokkardalli dahje guorahalli oahpahusdahkosa, masa máŋga fága leat čadnon.

Gihpa almmuhuvvo dál davvisámegillii ja dárogillii, sihke báberhámis ja PDF hámis. Diŋgo gihppaga báberhámis Sámi lohkanguovddážis: lohkanguovddas@samiskhs.no 

Viečča gihppaga dás Sámi lohkanguovddážis dahje Nasjonalt senter for kunst og kultur i opplæringen siidduin.