Sámi leavga
Sámi leavga
Sámis leat máŋga almmolaš leavgabeaivvi. Sámi álbmotbeaivi lea okta dain. Guovvamánu 6. beaivi lea almmolaš sámi leavgabeaivi ja lea maid almmolaš leavgabeaivi Norggas. Dalle levgejit sámi leavggain miehtá Norgga.
Sámi leavgga hábmii dáiddár Astrid Båhl, son lea Ivgubađas, Romssa fylkkas, Norgga bealde Sámis eret. Sámiráđđi lágidii leavgahábmengilvvu, man Astrid Båhl evttohus vuittii. 13. Sámekonferánsa mearridii 1986:s ahte dat maid dál dovdat sámi leavgan galgá leat sámiid almmolaš leavga. Sámi leavgga dimenšuvnnat ja ivnnit leat gávdnamis Sámedikki neahttabáikkis.
Leavgga jurdda lea vižžojuvvon meavrresgáris ja Anders Fjellnera divttas “Beaivvi bártnit”. Sámi leavggas leat geavahuvvon ivnnit mat leat dábálaččat gávttiin, alit, ruoksat, fiskat ja ruoná. Gierdu leavggas symbolisere beaivváža ja mánu.
Geahča dán filmmaža jus háliidat eambbo dieđuid leavgga birra: Hva betyr det samiske flagget? NRK
Dáppe vieččat fiillaid main leat leavggat ivdnema várás:
SNL siiddus: Gii lei Anders Fjellner?
SNL siiddus: Mii lea meavrresgárri?
SNL siiddus: Eanet dieđut sámi leavgga birra
Almmolaš sámi leavgabeaivvit
Almmolaš sámi leavgabeaivvit mearriduvvon sámekonferánssas Helssegis 1992, sámekonferánssas Murmánskkas 1996 ja sámekonferánssas Tråantes 2017:
Guovvamánu 6. beaivi - Sámeálbmotbeaivi maid ávvudit vuosttaš riikkačoahkkima muitun Troandimis 1917
Njukčamánu 2. beaivi - Suoma ođđa Sámedikki rahpan 1996
Njukčamánu 25. beaivi - Márjjábeaivi, árbevirolaš sámi bassebeaivi
Geassemánu 24. beaivi - Mihcamárbeaivi
Borgemánu 9. beaivi - ON riikkaidgaskasaš álgoálbmotbeaivi
Borgemánu 15. beaivi - Sámi leavga dohkkehuvvui dán beaivvi 1986
Borgemánu 18. beaivi - Sámiráđđi vuođđuduvvui dán beaivvi 1956
Borgemánu 26. beaivi - Ruoŧa Sámediggi vuođđuduvvui dán beaivvi 1993
Golggotmánu 9. beaivi - Norgga Sámediggi vuođđuduvvui dán beaivvi 1989
Skábmamánu 9. beaivi - Sámi áššiid delegašuvdna Suomas vuođđuduvvui dán beaivvi 1973
Skábmamánu 15. beaivi - Isak Saba riegádii dán beaivvi 1875. Son čálii sániid sámi álbmotlávlagii.
Skábmamánu 29. beaivi - Elsa Laula Renberga riegádanbeaivi 1877
