Elgåprosjekte

Saemien Lohkemejarnge, goevtese Elgå lea gïehtelamme bijjelen 1 jaepiem.
Latjkoe Saemiedigkien, Saemien jïlleskuvlen jïh Engerdalen tjïelten gaskem, juktie dam åarjelsaemien barkoem aarebi Elgå skuvlesne jåerhkedh, jååhkesjamme sjïdti Trysilisnie 05.02.13. Rïhpestimmie Saemien Lohkemejarngeste, goevtese Elgå lij 06.02.13.

Barkoelaavenjassh jïh prosjekth goevtesisnie leah åarjelsaemien teermh  siebriedahkefaagese jïh matematihkese darjodh. Kvaliteete gorresåvva learoematerijelleste Elgå skuvlesne jïh iktemearan bæjhkoehtamme sjædta learoevierhtieportaalesne. Elgåbyjrese aaj meatan aktene piloteprosjektesne learoevierhtieportaalese Aktesne, mij edtja dïrregh evtiedidh juktie digitaale learoevierhtieh darjodh . Dïhte barkoe learoevierhtine "Sïjte" lea minngemes boelhkesne jïh varke bæjhkoehtamme sjædta. Gïelespïele New Amigos åarjelsaemien gïelesne gaervies sjïdti dæjman.