Min birra

“Sámegiella buohkaid jurdagis, njálmmis ja gieðas”

Sámi lohkanguovddáš lea resursaguovddáš mii erenoamážit bargá oahpahusvuogádahkii buorrin, mánáidgárddi rájes gitta alit oahpu dási radjái.
Sámi lohkanguovddáš bargá viidát ovddidit njálmmálaš ja čálalaš sámegielageavaheami álbmogis.

Lohkanguovddáža váldosuorggit leat lohkan- ja čállinoahpahus, ja njálmmálaš giela ovdánahttin. Dása gullá nannet ja ovddidit sámgiela njálmmálaš geavaheami oahpahusvuogádagas, máŋggagielalašvuođa ja giellaealáskahttima birra, ja gaskkustit dieđuid lohkan- ja čállinmáhtu fágasuorggis. Mii bargat maid surggiide gullevaš dutkan- ja ovdánahttinbargguid.