Dovddut
Sámi lohkanguovddáš lea 2019:s ráhkadan plakáhta mas dovddut leat fáddán. Maŋŋel leat ráhkadan bagadusa, filmmaža ja goarttaid mas leat plakáhta govat ja sánit sihke davvi-, julev- ja lullisámegillii.
Bagadus lea dovdduid birra ja vuolggasadji lea sámegiella ja kultuvra. Ulbmiljoavkkut leat mánáidgárddit ja skuvllat gos leat sámi mánát ja nuorat. Bagadusas leat evttohusat doaimmaide ja movt sámi perspektiivvas sáhttá bargat dovdduiguin. Bagadusa sisdoallu lea heivehuvvon Mánáidgárddiid rámmaplána ja Máhttolokten 2020 mielde.
Mii leat ovttas oahpponeavvobálvalusain www.ovttas.no ja SANAGa psykologaiguin Anne Lene Turi Dimpasiin ja Margrethe Bals Utsiin, ráhkadan filmma movt sáhttá hupmat mánáiguin ja nuoraiguin dovdduid birra. Filbma lea davvisámegillii, muhto boahtá heivehuvvot julev- ja lullisámegillii, UNESCO ruhtadoarjagiin.
Goarttaiguin main leat govat ja sánit sáhttá earet eará speallat “Njelješgoarttat”, “Snap”, “Kortskalle”, “Med andre ord”, “áđđestallanspealut” dahje eará spealuid. Bagadusas gávdná eará árvalusaid movt goarttaid sáhttá atnit.
Sámi lohkanguovddáš sávvá dat oahpporesursat váikkuhit dasa ahte mánáidgárddiin ja skuvllain leat pedagogalaš reaiddut bargat dovdduiguin.
